Պետերբուրգյան միջազգային տնտեսական համաժողովում (ՊՄՏՀ) «Ռոսատոմը» մի քանի համաձայնագիր է ստորագրել արտասահմանյան գործընկերների հետ և քննարկել Հյուսիսային ծովային ճանապարհով փոխադրումների զարգացումը: Ռուսաստանի կառավարության մակարդակով ստորագրվել է նաև ատոմային էներգիայի օգտագործման վերաբերյալ համաձայնագիր: Պայմանավորվածությունները վկայում են միջազգային շուկայում պետկորպորացիայի դիրքերի ամրապնդման մասին:
«Ռոսատոմը» փաստաթղթեր է ստորագրել Ղազախստանում ռուսական նախագծով ատոմակայան կառուցելու վերաբերյալ: Լրացուցիչ տեղեկությունների համար տե՛ս այս համարի նորությունները:
Ռուսաստանի և աֆրիկյան Բուրկինա Ֆասոյի կառավարությունները համաձայնագիր են ստորագրել՝ ատոմային էներգիայի խաղաղ նպատակով օգտագործման ոլորտում համագործակցության մասին: Փաստաթուղթը Ռուսաստանի անունից ստորագրել է «Ռոսատոմի» գլխավոր տնօրեն Ալեքսեյ Լիխաչյովը, իսկ Բուրկինա Ֆասոյի կողմից՝ էներգետիկայի, հանքերի և քարհանքերի նախարար Յակուբ Զաբրե Գուբան: Համաձայնագիրը՝ երկու երկրների կողմից 2024 թվականի մարտին «Ատոմեքսպո» համաժողովի շրջանակում ստորագրված «ճանապարհային քարտեզի» շարունակությունն է:
Համաձայնագիրը ստեղծում է երկու երկրների միջև միջուկային էներգետիկայի և տեխնոլոգիաների ոլորտում համապարփակ համագործակցության իրավական հիմքը: Համագործակցության հիմնական ոլորտներից են Բուրկինա Ֆասոյի միջուկային ենթակառուցվածքների ստեղծման և բարելավման գործում միջազգային չափանիշներին համապատասխան օժանդակությունը, միջուկային և ճառագայթային անվտանգության հարցերի կարգավորումը, ինչպես նաև ռադիոիզոտոպների արտադրությունն ու օգտագործումը արդյունաբերության, բժշկության և գյուղատնտեսության մեջ: Համաձայնագիրը նախատեսում է ճառագայթային տեխնոլոգիաների և միջուկային բժշկության ոլորտում համատեղ նախագծեր, ինչպես նաև Բուրկինա Ֆասոյի միջուկային արդյունաբերության մասնագետների պատրաստում և վերապատրաստում:
«Ռոսատոմը» և Ուզբեկստանի Հանրապետության Նախարարների կաբինետին առընթեր Ատոմային էներգիայի զարգացման գործակալությունը համաձայնագիր են ստորագրել Ուզբեկստանում բարձր հզորության ատոմակայան կառուցելու նախագծի իրականացման հնարավորությունները ուսումնասիրելու վերաբերյալ: Համաձայնագիրը Ռուսաստանի նախագահ Վլադիմիր Պուտինի անցյալ տարվա մայիսին Ուզբեկստան կատարած պետական այցի ընթացքում ձեռք բերված պայմանավորվածությունների շարունակությունն է:
Փաստաթուղթը նախատեսում է ՋՋԷՌ-1000 ռեակտորներով երկու էներգաբլոկների հնարավոր կառուցման հիմնական պայմանները՝ ԱԷԿ-ը չորս էներգաբլոկով ընդլայնելու հնարավորությամբ: Նախագիծը հիմնված է ռուսական տեխնոլոգիաների վրա, որոնք արդեն իսկ ապացուցել են իրենց արդյունավետությունն ու անվտանգությունը Ռուսաստանում և արտերկրում՝ Չինաստանում («Տյանվան» ԱԷԿ) և Հնդկաստանում («Կուդանկուլամ» ԱԷԿ): Ընդհանուր առմամբ, ՋՋԷՌ-1000 ռեակտորները աշխատել են ավելի քան 420 ռեակտորային տարի:
ՊՄՏՀժի շրջանակում Ռուսաստան-Ինդոնեզիա բիզնես-երկխոսության ընթացքում հանդես է եկել Ռոսատոմի գլխավոր տնօրենի մեխանիկական ճարտարագիտության և արդյունաբերական լուծումների գշով տեղակալ Անդրեյ Նիկիպելովը։ Նա նշեց, որ Ինդոնեզիայի տնտեսական հզորությունը մեծացնելու լայնածավալ ծրագրերը չեն կարող իրականացվել առանց էներգետիկ ոլորտի միաժամանակյա զարգացման։ Նոր արտադրող հզորությունները պետք է լինեն էկոլոգիապես մաքուր՝ սա ներառված է երկրի՝ մինչև 2060 թվականը ածխածնային չեզոքության հասնելու պարտավորությունների մեջ։ «Ատոմային էներգետիկան՝ լուծում է, որը չի պահանջում ընտրություն կայուն հզորության և էկոլոգիայի միջև։ Մեծ և փոքր միջուկային արտադրությունը, որի կառուցման և շահագործման գործում «Ռոսատոմը» կուտակել է եզակի փորձ, կկարողանա ապահովել հուսալի «կանաչ» էներգիայի մատակարարում ինչպես երկրի բնակչությանը, այնպես էլ արդյունաբերությանը», — ասաց Անդրեյ Նիկիպելովը։
Ինդոնեզիայի՝ աշխարհի ամենամեծ կղզի-պետության համար լողացող էներգաբլոկները կարող են հարմար սկիզբ լինել միջուկային տեխնոլոգիաների ներդրման համար։ Սակայն, ինչպես ընդգծեց Անդրեյ Նիկիպելովը, փոքր ԱԷԿ-երը միայն սկիզբն են։ «Ռոսատոմը» մշակել և Ինդոնեզիայի ղեկավարությանը ներկայացրել է միջուկային էներգիայի զարգացման հայեցակարգ՝ հիմնված ինչպես փոքր, այնպես էլ մեծ հզորությունների վրա, և պատրաստ է համապարփակ աջակցություն ցուցաբերել երկրի ատոմային արդյունաբերության լայնածավալ զարգացման ծրագրերի իրականացման գործում։
«Հյուսիսային ծովային երթուղի՝ հայտնագործությունների տնտեսություն» և «Միջազգային առևտրի նոր երթուղիներ» նիստերում քննարկվել է Տրանսարկտիկական տրանսպորտային միջանցքի զարգացումը: Այն ներառում է ոչ միայն Հյուսիսային ծովային երթուղին (ՀԾԵ), այլև ցամաքային ենթակառուցվածքները՝ երկաթուղիները և ներքին ջրային ուղիները: Կալինինգրադից և Սանկտ Պետերբուրգից մինչև Վլադիվոստոկ երթուղիները Ռուսաստանի հյուսիսարևմտյան և արևելյան նավահանգիստների միջև ծովային լոգիստիկայի հիմքն են: Տրանսարկտիկական տրանսպորտային միջանցքը կապահովի երկրի տրանսպորտային ինքնիշխանությունը և հուսալի լոգիստիկան արտասահմանյան գործընկերների համար, վստահ է «Ռոսատոմ»-ի Արկտիկայի զարգացման հարցերով հատուկ ներկայացուցիչ և Արկտիկայի զարգացման պետական հանձնաժողովի փոխնախագահ Վլադիմիր Պանովը: Նա նշել է, որ արտասահմանյան գործընկերների հետաքրքրությունը Արկտիկայի նկատմամբ աճում է. այս տարի ՀԾԵ-ով նավարկության համար տրված թույլտվությունների թիվը նախորդ տարվա համեմատ աճել է 10%-ով՝ հասնելով 280-ի:
«Ռոսատոմ Լոգիստիկայի» գլխավոր տնօրեն Պետր Իվանովը նշել է տարբեր երթուղիների, այդ թվում՝ Տրանսարկտիկական տրանսպորտային միջանցքի զարգացման կարևորությունը, հատկապես լոգիստիկ գործընկերների և բարեկամ երկրների հետ համագործակցությամբ: Սա թույլ կտա ռուսական ընկերություններին ամրապնդել իրենց տեղը միջազգային տրանսպորտային շուկայում: «Մենք պետք է կենտրոնանանք ոչ միայն երկրի ներսում շահերը սպասարկելու վրա։ Մենք պետք է աշխատենք գլոբալ մակարդակով», — վստահ է Պետր Իվանովը։
